Според новиот извештај за богатство на „Најт Френк“ (Knight Frank Wealth Report), со еден милион долари можат да се купат само 16 квадратни метри во Монако, кој е најскапиот пазар за луксузни недвижности во светот кога се мери цената по квадратен метар. Тоа е пад во споредба со 17-те квадратни метри во 2020 година.
Во Хонг Конг, кој се наоѓа на второто место, со милион долари се купуваат 22,5 квадратни метри . Њујорк делува значително попристапно во споредба со Лондон, Сингапур и Женева – таму за милион долари се добиваат 33,9 квадратни метри.
Луксузните недвижности на повеќето големи пазари ширум светот и понатаму стануваат сè поскапи, бидејќи богатите стануваат уште побогати и сè помобилни, пишува CNBC. Минатата година цените на премиум недвижностите на 100-те пазари кои ги следи „Најт Френк“ пораснаа за 3,2 проценти, надминувајќи го растот на стандардниот глобален пазар на станови кој изнесуваше 2,9 проценти.
Блискиот Исток го предводеше глобалниот раст на луксузот минатата година, при што цените во Дубаи (Обединети Арапски Емирати) пораснаа за 25 проценти во 2025 година и за речиси 200 проценти во последните пет години, се наведува во извештајот. Токио беше најголемото изненадување во 2025 година, со раст на цените од 58 проценти. Манила, Сеул и Прага исто така забележаа силен раст.
Кога станува збор за идниот раст, „Најт Френк“ ги издвојува Мумбај, Бризбејн, Мајами и Хонг Конг како идни „жешки“ пазари за луксузни недвижности. Во извештајот се нагласува дека ултрабогатите луѓе се помобилни од кога било, купуваат домови ширум светот и почесто ги менуваат градовите.
Растот на даноците и сè поголемите регулаторни притисоци ја забрзуваат глобалната мобилност на капиталот. Како резултат на тоа, етаблираните центри како Лондон преминуваат на моделот „доаѓам-си одам“: места во кои се престојува поради работа, култура и поврзаност, а не нужно како постојано живеалиште, се вели во извештајот.
Лиам Бејли, глобален шеф за истражување во „Најт Френк“, изјави дека пазарите за луксузни недвижности со најдобри изгледи имаат ограничена понуда, придружена со силна привлечност во однос на животниот стил и даноците. Мајами, Милано и Дубаи, на пример, нудат поволни даночни услови. Њујорк и Лондон ги привлекуваат богатите поради начинот на живот и концентрацијата на бизниси, но стануваат помалку атрактивни поради високите даноци.
„Секој пазар што сака да привлече UHNW (Ultra High Net Worth – ултрависока нето вредност на богатство) капитал во следната деценија, мора да биде позициониран на привлечна точка од даночната крива. Капиталот веќе се префрла од средини со високи ‘триења’ кон јурисдикции кои активно го привлекуваат богатството“, заклучува Бејли.