Уделот на јагленот во вкупното производство на електрична енергија во Европската Унија минатата година падна на рекордно ниско ниво од 9,2 проценти, објави денес Евростат.
Од вкупното производство, камениот јаглен учествуваше со 3,7 проценти, или 105.601 гигават-часови (GWh) произведена електрична енергија, додека лигнитот имаше удел од 5,5 проценти, или 154.186 GWh.
Ако ги погледнеме статистичките податоци од подолг временски период, ќе видиме дека во 1990 година, уделот на јагленот во производството на електрична енергија беше поголем од 33 проценти.
До 2000 година, неговиот удел падна на 30,4 проценти, по што долгорочниот тренд продолжи, со краткорочни прекини во текот на 2011–2012 и 2021–2022 година.
Во 1990 година, камениот јаглен беше втор, а лигнитот трет најголем извор на електрична енергија во ЕУ, со учество од 19,8 проценти и 15,3 проценти.
До 2025 година, тие паднаа на седмо и шесто место, зад нуклеарната енергија, природниот гас и обновливите извори на енергија.
Падот на производството на електрична енергија од јаглен е придружен со намалување на неговата потрошувачка.
Некои земји-членки на ЕУ веќе се откажаа од употребата на јаглен.
Потрошувачката на камен јаглен во ЕУ се проценува на само 107 милиони тони во 2025 година, додека потрошувачката на лигнит беше околу 184 милиони тони, нови историски најниски вредности за двата вида јаглен.
Процесот на целосно напуштање на јагленот продолжува во одредени земји-членки на Европската Унија.
Португалија престана да користи тврд јаглен за производство на електрична енергија во 2021 година, додека Словачка престана да произведува лигнит во 2024 година.