Американската технолошка компанија Мета се соочува со една од најголемите правни закани во својата историја, бидејќи денес започнува судењето во Калифорнија за обвинувањата дека нејзините платформи на Фејсбук и Инстаграм се дизајнирани да поттикнат зависност кај децата и тинејџерите.
Тужбата против Мета ја води државниот обвинител на Калифорнија, Роб Бонта, а обвинители од 28 други американски држави тврдат дека Мета ги прекршила федералните и државните закони, вклучувајќи го Законот за заштита на приватноста на децата на интернет (COPPA) и прописите за заштита на потрошувачите, објавува CNBC.
Мета изгуби сличен случај пред помалку од две недели во државата Ново Мексико, каде што на компанијата ѝ беше наредено да плати вкупно речиси 1 милијарда долари, вклучувајќи 567 милиони долари во фонд за спогодба и 375 милиони долари врз основа на одлука на поротата за нефер деловни практики.
Потенцијалните последици од случајот во Калифорнија би можеле да бидат многу поголеми.
Адвокатите на Мета претходно изјавија дека консолидираната тужба може да доведе до штета од дури 1,4 трилиони долари, додека адвокатите на федералните држави веруваат дека сумата од околу 200 милијарди долари е пореална.
Уште поголем проблем за Мета би можеле да бидат промените во начинот на кој функционираат Фејсбук и Инстаграм.
Обвинителите бараат трајна забрана на одредени деловни практики ширум Соединетите држави, а меѓу функциите што сакаат да се отстранат или изменат се бесконечно лизгање, содржина за автоматска репродукција, привремена содржина, филтри за разубавување и алгоритми оптимизирани за да се зголеми ангажманот на корисниците.
Мета ги негира обвинувањата
Во случај на прекршување на COPPA, државите бараат од Мета да ги избрише личните податоци на деца под 13-годишна возраст, како и алгоритмите и моделите на вештачка интелигенција обучени за тие податоци.
Мета ги отфрла обвинувањата и тврди дека барањата на државните обвинители се неосновани и финансиски непропорционални.
Компанијата вели дека државите не докажале дека нивните жители биле заведени и се обидуваат да ja казнат Мета за проблемите што ја мачат целата индустрија на социјалните мрежи, како што е проверката на возраста на корисниците.
Пресудата која ќе ја принуди Мета да ги промени клучните алгоритми и функции на Фејсбук и Инстаграм може да влијае на целиот бизнис модел на компанијата, но и да создаде преседан за другите големи социјални мрежи во САД.