Рекордно ниското ниво на водата во реките е нова кочница за закрепнувањето на домашната економија, објави во четврток германската централна банка.
„Економијата ќе расте минимално, ако воопшто ќе расте, во третиот квартал“, процени Бундесбанк во својот нов месечен извештај.
Речниот транспорт игра важна улога во германската економија. Водата се повлече во сите реки, вклучително и во Рајна, што го отежнува сообраќајот.
„Ова веројатно значително ќе ја оптовари индустријата која штотуку почнува да добива на интензитет“, предупреди Бундесбанк.
Последиците ќе ги почувствува и извозот, кој во последните месеци беше главен генератор на неочекувано силен раст. Состојбата на реките би можела да го поништи ефектот од силната страна на побарувачката, се вели во извештајот.
Во исто време, домашната потрошувачка продолжува да биде задушена од постојано високите цени на енергијата.
Инфлацијата, која се забрза на 2,8 проценти по завршувањето на субвенциите за гориво за автомобили на државата во јули, веројатно ќе остане висока во наредните месеци, проценува Бундесбанк.
И покрај последиците од војната во Иран, германската економија постигна неочекувано добри резултати во првата половина од годината. По растот од 0,4 проценти во првиот квартал, трендот продолжи и во вториот, со проценет економски раст од 0,2 проценти.
Бундесбанк оценува дека домашната економија „сега е јасно на патот кон закрепнување, кое дури ни војната на Блискиот Исток не го забавила“.