Германската енергетска компанија „Унипер“ потпиша долгорочен договор со норвешкиот производител „Еквинор“ за снабдување со природен гас од таа скандинавска земја, чии испораки во Германија во количини што надминуваат 30 терават-часови годишно треба да започнат во 2027 година, објави ДПА.
Договорот е склучен за период од 15 години и е потпишан во понеделник во норвешкиот град Ставангер, објави „Унипер“, без да ја открие финансиската вредност на договорената зделка.
Гас ќе се испорачува во Германија преку постојните гасоводи.
„Со овој договор, го зајакнуваме долгорочното снабдување со гас на Германија и во исто време ја продлабочуваме нашата соработка со „Еквинор“, изјави извршниот директор на „Унипер“, Мајкл Луис.
„Унипер“ е еден од најголемите европски трговци на големо со гас, кој снабдува комунални услуги, големи индустриски потрошувачи и оператори на електрани. Моментално е речиси целосно во сопственост на германската држава, но мора да го намали својот удел на максимум 25 проценти плус една акција до крајот на 2028 година.