Привремената претседателка на Венецуела, Делси Родригез, изјави дека енергетскиот договор со Соединетите Американски Држави ќе биде во сила во следните 25 години, со кој се согласија да се зголеми производството на сурова нафта и да се одржи суверенитетот на земјата над природните ресурси.
Родригез вели дека ова е историски договор што ќе помогне во заживувањето на економијата и зголемувањето на државните приходи.
„Историски договор“
„Овој 25-годишен билатерален проект вклучува развој на 17 стратешки нафтени полиња за да има производство од повеќе од 1,5 милиони барели дневно. Оваа бројка се однесува исклучиво на билатералниот договор меѓу Венецуела и Соединетите Американски Држави“, рече Родригез на државната телевизија.
Американскиот претседател Доналд Трамп во петокот изјави дека САД, преку партнерства со приватни компании, обезбедиле мнозинска контрола врз нафтените резерви на Венецуела, кои надминуваат 65 милијарди барели. САД на тој начин ќе ја рестартираат мртвата енергетска индустрија на таа јужноамериканска земја, рече тој, а новиот извор на сурова нафта ќе помогне и во намалувањето на цените на горивата во САД.
Венецуела е земјата со најголеми нафтени резерви во светот. Сепак, по години недоволно инвестирање, лошо управување и санкции, нејзиното производство е 1,25 милиони барели дневно, под нејзиниот потенцијал.