Војната меѓу САД и Израел против Иран ги наруши испораките на течен природен гас од земјите од Персискиот Залив, поради што купувачите на течен природен гас ширум светот почнуваат да бараат нови добавувачи и алтернативни транспортни правци, оценија претставниците на индустријата на конференција во Бангкок. Азиските земји се стремат да обезбедат договори со компании кои можат да снабдуваат гас од различни региони, додека производителите и трговците се обидуваат да ја намалат зависноста од единечни извори со инвестирање во гасни полиња и проширување на операциите на повеќе пазари.
Промената во стратегијата би можела да им биде од корист на производителите надвор од САД и Катар, кои моментално доминираат во идните зголемувања на глобалниот производствен капацитет на течен природен гас . Сепак, Катар, исто така, претрпе штета на својата инфраструктура за време на војната. Тајландската државна PTT, на пример, размислува за набавка на гас од Оман, Северна Америка и Западна Африка.
Во исто време, енергетските компании се обидуваат да ги распределат инвестициите на поголем број проекти и земји со цел да го намалат деловниот ризик. Јапонскиот „Инпекс“ е особено фокусиран на развојот на гасното поле „Абади“ во Индонезија, за кое конечната одлука за инвестирање треба да се донесе кон средината на 2027 година, а планираниот капацитет на проектот е 9,5 милиони тони течен природен гас годишно. На долг рок, компанијата размислува за проширување на својот бизнис на пазарите во Северна и Јужна Америка, вклучувајќи ги САД и евентуално Бразил.
Променливата слика за глобалната понуда значи дека се очекуваат нови проекти за течен природен гас во сè поголем број региони.