Бројот на комерцијални летови во Европската Унија продолжи да расте во текот на летната сезона, па така во август годинава беа регистрирани 708.980 летови, што е за 2,3 проценти повеќе во однос на истиот месец од 2025 година.
Во споредба со август 2024 година, бројот на летови беше поголем за 5,7 проценти, според најновите податоци на Евростат.
Во текот на трите летни месеци, од јуни до август, во Европската Унија беа реализирани повеќе од два милиони комерцијални летови.
Најпрометниот месец беше јули, кога беа регистрирани 709.931 летови. Ова е раст од 2,8 проценти на годишна основа, додека во споредба со 2024 година, бројот на летови се зголеми за 5,7 проценти.
Во јуни беа реализирани 662.480 комерцијални летови, што претставува раст од 2,1 процент во споредба со истиот месец минатата година и 4,9 проценти во споредба со јуни 2024 година.
Зголемување на бројот на летови во август е забележано во 19 земји-членки на ЕУ, додека намалување е забележано во осум земји.
Највисок годишен раст има Словачка, дури 37 отсто, потоа Малта со 12,4 отсто и Естонија со раст од 8,3 отсто.
Од друга страна, најголем пад на бројот на комерцијални летови е забележан во Австрија, каде имало 4,7 отсто помалку од претходната година. По нив следуваат Кипар со пад од три отсто и Германија со пад од 2,4 отсто.
Податоците вклучуваат редовни и нередовни комерцијални летови, вклучувајќи патници, товар и пошта, управувани според правилата за лет со инструменти.
Изворот на месечните податоци што ги објавува Евростат е Еуроконтрол, паневропска цивилно-воена организација задолжена за поддршка на европскиот воздушен сообраќај.