Според желбите на Џорџо Армани, модната куќа треба да започне со процесот на продажба на малцински удел на LVMH, L’Oréal и EssilorLuxottica. Проблемот е што луксузниот сектор поминува низ послаб период, додека потенцијалните купувачи веќе имаат свои стратешки приоритети.
Модната куќа Армани го подготвува процесот на продажба на малцински удел во согласност со упатствата оставени од нејзиниот основач Џорџо Армани, а меѓу потенцијалните купувачи се LVMH, L’Oréal и EssilorLuxottica.
Идејата на прв поглед изгледа логична. Армани останува еден од најпрепознатливите глобални луксузни брендови, со силен идентитет и широка база на клиенти. Надворешен инвеститор би можел да помогне во стабилизирањето на бизнисот по заминувањето на основачот и да отвори простор за следната фаза од развојот на компанијата. Но, моментот за продажба не е идеален.
Луксузниот сектор поминува низ забавување, а акциите на LVMH паднаа за речиси 40 проценти оваа година. Во исто време, француската групација намалува дел од своето портфолио и неодамна го продаде Marc Jacobs.
Двајцата други потенцијални купувачи исто така не се без свои приоритети. EssilorLuxottica инвестира многу во развој на паметни очила со Meta, додека L’Oréal неодамна вложи значителен капитал во договор со Kering.
Можна поделба на уделот од 15 проценти помеѓу три купувачи
Една од опциите што се дискутира е да се поделат понудените 15 проценти од Армани помеѓу сите три потенцијални купувачи. Таквиот модел би можел да им одговара на сите страни.
„EssilorLuxottica“ би ги заштитила своите интереси поврзани со лиценците за очила „Армани“, додека „Лореал“ би го обезбедил постојниот бизнис поврзан со сегментот за убавина.
Од друга страна, „ LVMH“ би можел да добие почетна позиција за евентуално поголемо преземање во иднина.