Извозот на автомобили од Србија во првите шест месеци од 2026 година достигна вредност од околу 2,8 милијарди евра, а најголем придонес за таков резултат имаше „Стелантис“ од Крагуевац, а моделот „Фиат Гранде Панда“ стана еден од главните двигатели на извозот, особено на пазарот на Европската Унија.
Извозот забележа раст од 51,1 процент во споредба со истиот период минатата година, објавува порталот „иКрагуевац“.
Според податоците на Републичкиот завод за статистика, автомобилската индустрија имала највисока поединечна вредност меѓу извозните области.
На зголемувањето на производството во фабриката во Крагуевац влијаеше и големиот интерес на купувачите во Европа.
Според неофицијални информации, обемот на производство е повеќе од двојно зголемен во однос на почетокот на 2026 година, кога дневно од производствените линии излегуваа околу 200 возила.
Бојан Станиќ од Стопанската комора на Србија оцени дека напредокот на автомобилската индустрија е многу значаен за домашната економија.
Тој изјави дека автомобилите станале еден од најважните извозни производи на Србија, што придонесува за намалување на дефицитот во надворешната трговија.
Станиќ ја посочи и важноста на фабриката за домашните добавувачи, работници и инженери.
Според него, Србија е препознаена како поволна дестинација за инвестиции бидејќи може да реализира големи инвестиции и да произведува квалитетни возила.
Тој додаде дека Србија има единствена фабрика со таква сила во овој дел од Западен Балкан.
Една од причините за интересот на клиентите за моделГранде Панда се неговите цени.
Бензинската верзија чини 15.490 евра, хибридниот модел чини 17.640 евра, додека цената на електричната верзија е 24.990 евра.