Европскиот фонд за одбрана (ЕDF) постигна нов пробив оваа година со привлекување на рекордни 612 предлози за проекти во врска со соработката, истражувањето и развојот во областа на заедничката европска одбрана.
Овој фонд беше лансиран во 2021 година, а бројот на предложени проекти е за 49 проценти поголем од минатата година. Во 2025 година, овој раст во споредба со 2024 година изнесуваше 38 проценти.
Износот на пари достапен за оваа година е 1,006 милијарди евра. Според Европската комисија, меѓу регистрираните кандидати за финансирање на проекти има веќе докажани индустриски играчи во секторот, но и неодамна воспоставени иновативни компании кои сакаат да соработуваат во новата генерација на одбранбени технологии.
За прв пат, тендерот за проекти беше отворен и за заинтересирани кандидати од Украина врз основа на стапувањето во сила на договорот за придружно членство на таа земја во EDF.
Половина од буџетот за оваа година е наменет за соработка во истражувањето и развојот на одбранбените капацитети, при што одредени предлози се градат врз основа на претходно финансирани проекти со цел развој на прототипови подготвени за понатамошно производство.
Меѓу таквите проекти се Европскиот атмосферски ракетен пресретнувач, нова генерација главни борбени тенкови, повеќекратен ракетен фрлач и полуавтономно воено пловило.
Меѓу важните области за финансирање на проекти се и електронското војување или развојот на високоефикасни енергетски системи.
Четвртина од годишниот буџет е наменет за спроведување на Европската шема за одбранбени иновации (EUDIS), која го поддржува развојот на револуционерни технологии за воена примена. Ова вклучува 60 милиони евра специјално наменети за вакви технологии.
Европската комисија наведува дека особено голем број предлози се примени во делот наменет за финансирање на мали и средни претпријатија, што ја покажува исклучителната важност на EUDIS за ваквите компании и ги потврдува придобивките од поедноставената постапка за аплицирање.
Сега предложените проекти ќе поминат низ строг процес на евалуација. Резултатите од конкурсот за финансирање за оваа година ќе бидат познати во март 2027 година.
Патем, вкупниот буџет на EDF за периодот од 2021 до 2027 година изнесува 7,3 милијарди евра.