Германската индустрија веќе долго време го намалува бројот на работни места – од 2019 година до крајот на минатата година, бројот на вработени се намали за 7,1 процент, или за околу 496.000 луѓе, објави филијалата на институтот Ифо во Дрезден.
Трендот е особено силен во традиционално клучните гранки на германската економија.
Автомобилската индустрија намали 123.500 или 13 проценти од работните места, производството на метали го намали бројот на вработени за 115.600, а машинското инженерство за 64.500.
Од друга страна, услужниот сектор отвори повеќе од 2,2 милиони нови работни места, првенствено во здравството и социјалната заштита, но и во јавната администрација.
Здравството има 391.000 нови работни места, а социјалниот сектор, заедно со домовите за стари лица, 357.000. Аналитичарите го припишуваат ова на стареењето на населението. Бројот на вработени во јавната администрација се зголеми за 329.000.
Во делот од услужниот сектор кој е во приватна сопственост, ИТ компаниите вработуваа најмногу.
Заменик-шефот на филијалата на Ифо, Јоаким Рагниц, посочи на „изразени структурни промени“. „Токму оние гранки кои ја носеа нашата благосостојба се намалуваат“, рече тој.
Нови работни места генерално не се создаваат таму каде што Германија е особено продуктивна и иновативна, а „ова може да го забави потенцијалот за раст“, додаде Рагниц.
Студијата се базира на статистика за вработување од Федералната агенција за вработување.