ДЗС: Економската состојба во декември 2013 година понеповолна од ноември

Според податоците на Државниот завод за статистика, раководителите ја оценуваат економската состојба на деловните субјекти во декември 2013 година како понеповолна во однос на претходниот месец, а како поповолна во однос на декември 2012 година.
Оценката за обезбеденоста на производството со порачки е речиси на еднакво ниво како и во претходниот месец. Oценката за обемот на производството во декември 2013 година е понеповолна во однос на претходниот месец, очекувањата за обемот на производството во наредните три месеци се поповолни, а очекувањата за бројот на вработени се дека нивниот број ќе се намали.
Во декември 2013 година, залихите на суровини и репроматеријали, како и тековните набавки на суровини и репроматеријали се под и околу нормалата. Залихите на готовите производи во декември 2013 година се намалени во споредба со претходниот месец. Просечното искористување на капацитетите на деловните субјекти во декември 2013 година изнесува 60,1% од нормалното искористување. Најголемо влијание на ограничувањето на обемот на производството во декември 2013 година имаат следните фактори: недоволната странска побарувачка со 25,8%, недоволната домашна побарувачка со 18,9%, неизвесното економско опкружување со 10,1% и финансиските проблеми со 9,6%.