Aпликацијата Bee Clever на Игор Христов, Герчо Атанасов, Марија Петрушевска, Љупчо Јовановски, која претставува уникатен концепт за рана едукација на деца преку забавни игри е прогласена за најдобра апликација на конкурсот Vip Македонски предизвик.
Игрите BeeClever се фокусирани на предучилишното образование односно деца на возраст од три до седум години. Главната награда за победничката апликација е 5.000 евра, премиум договор за поделба на приход од 90% за програмерот, бесплатна промоција на апликацијата од страна на Вип оператор во период од 12 месеци и Samsung Galaxy Note 10.1.
Најиновативна апликација е Прелистај на најмладиот учесник Филип Димитровски (13). Прелистај е социјален читач на вести и групни попусти. За најкорисна апликација е прогласена iLearn на Огнен Плавевски – апликација која овозможува креирање на курсеви и часови и таргетирање на истите кон одредени студенти и ученици со текстуални, аудио, видео содржини и тестови кои го проверуваат знаењето на учениците. За најпопуларна апликација според интересот на корисниците е Doktori.mk на тимот Мартин Митревски, Виктор Митревски и Ема Танаскоска. За дебитант на предизвикот е прогласена апликацијата Нутрио на Александра Матеска, Милан Захариев, Јасмина Пазарџиска, Бисера Јанкуловска и Михјало Павловски.
Секоја од овие четири апликации беа наградени со договор за поделба на приход од 80% за програмерот, бесплатна промоција на апликацијата од страна на Вип оператор во период од три месеци и Samsung Galaxy SIII.
Преку конкурсот Vip Македонски предизвик, Вип оператор ги „предизвика“ сите поединци, компании, студенти, ученици, универзитети и групи да креираат апликации кои ќе бидат наманети за паметните телефони кои работат на Android платформа. На конкурсот беа пријавени вкупно 55 апликации.
Ова е втор по ред Android предизвик кој Вип го организира за развој на локално применливи апликации.
За првпат во Македонија е отворена Vip Store, продавница за мобилни апликации која ќе им овозможи на програмерите да ги ставаат своите апликации. Сите апликации веќе се достапни за симнување од Вип продавницата.
