Повеќе стратешки партнери се пријавиле на повикот на словенечкиот државен фонд СОД да искажат интерес за приватизација на Телеком Словеније. Освен Deutsche Telekom, меѓу заинтересираните се и турски Turkcell и руски MTS, како и повеќе финансиски фондови. Рокот за искажување интерес истече кон крајот на минатиот месец, а СОД наскоро ќе започне да ги собира необврзувачките понуди на заинтересираните, пишува словенечки Финанце.
На продажба е ставен пакет од 4,75 милиони акции или 72,75% од вкупниот број на акции на Телеком Словеније кои се во сопственост на државата, Капиталска дружба (КАД) и осигурителните куќи Триглав и Позаваровалница Сава. Моменталната цена за акција на Љубљанската берза е нешто преку 140 евра, а при преземањето би можела да стигне меѓу 150 и 180 евра, па државата за својот удел би можела да добие околу 900 милиони евра.
Телеком Словеније би можел новиот сопственик да го добие уште во рана есен, пишува Финанце.
