Компанијата од Латвија Helico Aerospace Industries креираше беспилотно летало – Air Dog, што користи сензори наместо далечинско управување, и самостојно избира каде да оди.
Технологијата на безпилотни летала бележи постојан напредок, а оваа млада компанија од Латвија покажа дека дизајнирањето на летала може да биде мошне успешен бизнис.
Како што камерите стануваат се помали и поквалитетни, спортските ентузијасти ширум светот едвај ја дочекаа приликата да ги снимат свои подвизи на иновативен начин.
“Технологијата на Air Dog е многу комплицирана. Корисникот носи нараквица која, со помош на сензори, го следи движењето на леталото. Кога корисникот се движи, леталото го следи неговото движење и во исто време ја фокусира камерата кон него. За таа технологија беа потребни многу иновации, а имаме пет решенија кои се единствени за нашиот производ“, вели Јанис Спогис, коосновач на Helico Aerospace Industries.
Дронот тежи 1,6 килограми, а за снимање на активностите на корисникот задолжена е Go Pro камера, а рамката е стабилизирана и може да достигне брзина до 70 километри на час, доволно брзо да може да следи брз автомобил.
Оперативната оддалеченост на беспилотното летало изнесува меѓу 300 и 500 метри, но засега може да лета само 15 минути.
Компанијата за проектот собра повеќе од 850.000 долари преку Kickstarter. Производството на Air Dog би требало да започне во октомври, а на оние кои обезбедија средства преку Kickstarter ќе им биде овозможена испораката еден месец подоцна.
