Медиумскиот могул Бери Дилер заедно со неговата сопруга ќе финансираат 113 милиони долари во изградба на јавен пловечки парк и простор за забави на пристаништето на реката Хадсон.
Зданието кое ќе никне над реката ќе го носи името Pier 55 и се очекува да чини повеќе од 130 милиони долари. Градот Њујорк ќе обезбеди 17 милиони, а државата ќе донира дополнителни 18 милиони долари за изградба на плоштад кој ќе води до паркот.
Паркот ќе биде изграден на платформа која ќе биде оддалечена 57 метри од брегот на реката Хадсон. Самата платформа ќе биде поставена на бетонски столбови во вид на печурка, пишува New York Times.
Градбата која ќе го разубавува брегот ќе располага и со бујни градини, шеталишта и амфитеатар со 700 седишта, каде ќе се одржуваат разни настани и претстави.
Конструкцијата на паркот се планира да започне во 2016 година.
