Аеродромот Никола Тесла во Белград започна двогодишен инвестициски циклус вреден 20,2 милиони евра, со кој ќе бидат проширени терминалните капацитети за 20%, односно за 11.000 нови метри квадратни. Планирана е и изградба меѓу три и осум илјади метри квадратни комерцијални содржини.
Директорката за инвестиции и развој на аеродромот Никола Тесла, Ана Луковиќ истакна дека 2014 година беше рекордна година за ова претпријатие на сите полиња и поради тоа аеродромот одлучи да ги зголеми капацитетите, јавува Танјуг.
Аеродромот во 2014 година забележа раст на патниците од 31% и трендот на раст продолжува и во првите три месеци од оваа година. Низ аеродромот минатата година минале 4,6 милиони патници, а вкупниот капацитет е 5,5 милиони патници. Приходите лани биле поголеми за 56% и изнесувале 89,1 милиони евра, а нето добивката изнесувала 26,8 милиони евра.