Новата 2026 година донесе вистински земјотрес на листата на најбогатите луѓе во светот, каде речиси половина од милијардерите во топ-10 ги променија своите позиции. Додека глобалните пазари се превираат, Илон Маск продолжува да поставува незамисливи рекорди, заработувајќи неверојатни 48 милијарди долари само во текот на јануари. Истовремено, Алис Волтон ја зацврсти својата позиција како најбогата жена на планетата
Заклучно со 1 февруари 2026 година (на полноќ по источноамериканско време), нето-богатството на Маск се проценува на 775 милијарди долари. Само во текот на јануари тој го зголеми своето богатство за дополнителни 48 милијарди долари, со што се оддалечи речиси половина билион долари од второпласираниот на листата.
Маск на чекор до историски рекорд
Маск е на дофат да стане првата личност во историјата со богатство од 800 милијарди долари, благодарение на експлозивниот раст на неговата компанија за вештачка интелигенција и социјални мрежи xAI Holdings. Компанијата неодамна обезбеди 20 милијарди долари приватни инвестиции, при што беше проценета на 250 милијарди долари. Ова ја зголеми вредноста на уделот на Маск (49 проценти) на околу 122 милијарди долари.
Неговиот подем продолжува и покрај тоа што Tesla забележа прв годишен пад на приходите во својата историја, додека вредноста на SpaceX и натаму расте. Маск веќе постави низа рекорди: во октомври ја надмина границата од 500 милијарди долари, во средината на декември 600 милијарди, а на 19 декември и 700 милијарди долари.
Трката зад лидерот
На второто место трет месец по ред е коосновачот на Google, Лери Пејџ, со проценето богатство од 277 милијарди долари, по раст од 20 милијарди долари, поттикнат од осумпроцентниот пораст на акциите на Alphabet.
Неговиот партнер Сергеј Брин напредуваше за две позиции и се искачи на третото место, со 255 милијарди долари, по зголемување на нето-вредноста за 18 милијарди долари.
Добар месец имаше и Марк Цукерберг, чиј имот порасна на 246 милијарди долари, благодарение на растот на акциите на Meta. Тоа му донесе и скок од една позиција на листата.
Губитници и стабилни позиции
Најголем губитник во јануари беше Лери Елисон. Падот од 17 проценти на акциите на Oracle му одзеде околу 34 милијарди долари, спуштајќи го од третото на шестото место со 211 милијарди долари.
Францускиот магнат Бернар Арно остана седми, иако неговото богатство се намали за 26 милијарди долари на 169 милијарди, поради падот на акциите на луксузниот конгломерат LVMH.
Шпанскиот претприемач Амансио Ортега повторно се најде меѓу првите десет, со 145 милијарди долари, искачувајќи се од 11. на 9. место, и покрај благото намалување на вредноста на Inditex. Од топ-10 испадна Стив Балмер, по падот на акциите на Microsoft.
Вкупното богатство и најбогатата жена
Според Forbes, вкупното богатство на десетте најбогати луѓе во светот изнесува 2,6 билиони долари, исто колку и минатиот месец. Списанието ги следи светските милијардери уште од 1987 година, а во април 2025 година идентификуваше вкупно 3.028 милијардери ширум светот.
Најбогата жена на планетата е Алис Волтон, ќерка на основачот на Walmart Сем Волтон. Нејзиното богатство се проценува на 126 милијарди долари, што ја позиционира како 15. најбогата личност во светот.
Десетте најбогати луѓе во светот (1 февруари 2026)
Илон Маск – 775 милијарди долари (Tesla, SpaceX, xAI, X)
Лери Пејџ – 277 милијарди долари (Google)
Сергеј Брин – 255 милијарди долари (Google)
Џеф Безос – 250 милијарди долари (Amazon)
Марк Закерберг – 246 милијарди долари (Meta)
Лери Елисон – 211 милијарди долари (Oracle)
Бернар Арно – 169 милијарди долари (LVMH)
Џенсен Хуанг – 166 милијарди долари (Nvidia)
Амансио Ортега – 145 милијарди долари (Zara)
Ворен Бафет – 142 милијарди долари (Berkshire Hathaway)
