Американската компанија Амазон планира да инвестира уште 10 милијарди евра во Германија, од кои најголемиот дел ќе биде во нејзините интернет услуги во облак.
Помал дел ќе се инвестира во проширување на логистиката, роботиката и две нови корпоративни централи, објави во средата германското седиште на Амазон во Минхен.
Германската работна сила на Амазон се очекува да порасне на 40.000 вработени со полно работно време до крајот на годината од околу 36.000 во 2023 година.
Компанијата, која е основана летото 1994 година, денес вработува повеќе од 1,5 милиони луѓе ширум светот, од кои повеќето сè уште се со седиште во САД.
Сепак, Германија е важен странски пазар за Амазон. Групацијата го процени вкупниот износ на тековно планираните инвестиции во Германија на 17,8 милијарди евра.
Од дополнителните 10 милијарди, американската групација сака да потроши 8,8 милијарди во областа Рајна-Мајна до 2026 година, со цел да го прошири бизнисот на својата подружница во облак Amazon Web Services (AWS).
„Германија е срцето на нашата иновација за цела Европа“, рече шефот на AWS за Германија и Централна Европа, Стефан Хехбауер (Хохбауер).
Според сопствените податоци, Амазон има инвестирано повеќе од 77 милијарди евра во Германија од 2010 година.