Американските регулатори одобрија продажба на чипови за автомобили на Huawei

35

Американските власти ги одобрија барањата за лиценци во вредност од стотици милиони долари на кинеската телекомуникациска компанија Huawei, за купување чипови за нејзиниот растечки бизнис со автомобилски компоненти, изјавија двајца соговорници од оваа индустрија за Ројтерс.

Huawei, најголемиот производител на телекомуникациска опрема во светот, веќе извесно време е под влијание на трговските ограничувања на американската администрација, поради што, меѓу другото, почна да ја губи својата позиција на глобалниот пазар. Администрацијата на Трамп воведе забрана за продажба на чипови и други компоненти што се користат во нејзината мрежна опрема и паметни телефони. Администрацијата на Бајден дополнително го зајакна овој првичен став, негирајќи им на кинеската компанија дозвола за купување чипови за употреба во 5G уреди.

Меѓутоа, во последниве недели и месеци, експерти запознаени со процесот на поднесување побарувања до американските регулатори, за Ројтерс изјавија дека САД издале одредени лиценци со кои се овластуваат добавувачите да продаваат чипови на Huawei за компоненти на возила, како што се видео екрани и сензори. Одобрувањата доаѓаат во време кога Huawei го свртува својот бизнис кон категории кои се помалку предмет на американски забрани за трговија.

Автомобилските чипови генерално не се сметаат за софистицирани. Сепак, извор од британската новинска агенција истакна дека американската влада издава лиценци за чипови во возила што може да имаат други компоненти со 5G способност.

Запрашан за лиценци за автомобилската индустрија, портпаролот на американското Министерство за трговија рече дека владата продолжува доследно да ги применува политиките за лиценцирање „за да го ограничи пристапот до стоки, софтвер или технологија на Huawei за активности што можат да наштетат на националната безбедност на САД и надворешнополитичките интереси“. На Министерството за трговија му е забрането да открива одобренија или одбивања на лиценци, додаде неименуваното лице.

Портпаролката на Huawei одби да коментира за лиценците, но рече дека кинескиот производител „се позиционира како нов снабдувач на компоненти за интелигентни мрежни возила, а нашата цел е да им помогнеме на производителите на автомобили да направат подобри возила“.

Повикувајќи се на неизговорени и нереализирани, но потенцијални закани за националната безбедност и американските надворешнополитички интереси, САД направија се за да го забават растот на клучниот комуникациски бизнис на компанијата.

Откако Huawei беше ставен на црната листа од страна на американското Министерство за трговија во 2019 година, со што се забрани продажба на американска стока и технологија на компании без специјални лиценци, САД минатата година ги зголемија санкциите за да ја ограничат продажбата на чипови произведени во странство со американска опрема. Таа, исто така, водеше кампања за да ги исклучи нејзините политички сојузници, претежно од Европа, од нивните 5G Huawei мрежи.

Како резултат на тоа, Huawei го објави својот најголем пад на приходите досега, во првата половина на 2021 година, откако американските ограничувања ја натераа да продаде дел од некогаш доминантниот бизнис со телефони и пред да созреат новите области на корпоративен раст.

Подвлекувајќи ја транзицијата кон паметни автомобили, претседателот на ротирачката компанија Ерик Ксу претходно оваа година на салонот во Шангај најави потпишување партнерства со три кинески државни производители на автомобили за да го испорача Huawei Inside, оперативен систем за паметни возила.

Откако добавувачите добија дозволи за продажба на чипови во вредност од десетици милиони долари на санкционираната компанија, Huawei поднесе нови апликации за поголеми количини, во вредност до две милијарди долари, велат изворите. Ваквите лиценци обично траат четири години.

Ричард Барнет, директор за маркетинг во глобалната консултантска фирма за електроника наречена Supply Frame, истакнува дека Huawei е во „почетната фаза“ на обид да инвестира во автомобилскиот пазар, кој во моментов вреди 5.000 милијарди долари и има голем потенцијал за раст и во рамките на и надвор од Кина.

„Автомобилите и камионите сега се компјутери на тркала“, рече Барнет. „Таа конвергенција е она што го тера стратешкиот фокус на Huawei да стане поголем играч во новото поле“, објави Ројтерс.