Деловните прогнози за корпоративниот сектор во Европа продолжуваат да се влошуваат, покажаа најновите проекции објавени во вторник, бидејќи неизвесноста околу американските тарифи продолжува да го попречува планирањето на бизнисот.
Според најновите прогнози, се очекува дека во вториот квартал од оваа година, европските корпорации ќе имаат просечен пад на профитот од 0,2 проценти на годишна основа, според податоците на LSEG. Иако прогнозите на аналитичарите постојано се намалуваат од април оваа година, тие за прв пат паднаа на негативна територија – само пред една недела аналитичарите проектираа раст од 0,6 проценти, далеку од врвот од 9,7 проценти во март 2025 година.
Пред американскиот претседател Доналд Трамп да го објави воведувањето на неговите „реципрочни“ тарифи со остатокот од светот на 14 февруари, се предвидуваше дека корпоративните профити ќе пораснат за 9,1 процент во вториот квартал, покажаа податоците на LSEG – но неколку месеци во голема мера неуспешни трговски разговори доведоа до песимизам кај аналитичарите.
Консензуалните заработки исто така се влошија во истиот период, бидејќи аналитичарите сега очекуваат приходите да се намалат за 3,0 проценти, во споредба со минатонеделната прогноза за пад од 2,2 проценти.
Претставници на Европската Унија тврдат дека се блиску до постигнување трговски договор со администрацијата на Трамп пред неговиот рок на 9 јули и велат дека би било можно и ослободување од „основната“ увозна давачка на САД од 10 проценти.
Подоцна оваа недела ќе бидат објавени резултатите од продажбата и испораките на нови возила од автомобилскиот гигант „Стелантис“, кој се тргува на миланската берза, што би можело да фрли светлина врз тоа како европските производители минуваат низ период на глобална неизвесност.
Од друга страна, се очекува дека најголемите европски победници во вториот квартал од оваа година ќе бидат ирските и полските компании кои се дел од паневропскиот берзански индекс STOXX 600, чија заработка треба да порасне за 85,4 проценти и 67,4 проценти, соодветно. Најголеми губитници треба да бидат норвешките и германските компании, кои, според прогнозите, ќе имаат пад на заработката од 9,7 проценти и 7,8 проценти, соодветно.
И покрај песимистичките прогнози, индексот STOXX 600 порасна за 7,1 процент од почетокот на годината.