Глобалните пазари на нафта ќе се справат со прекините во Црвеното Море на краток рок, иако продолжените напади на Хутите врз бродовите ќе доведат до недостиг на танкери поради подолги патувања и доцнење на снабдувањето, рече извршниот директор на Саудиска Арамко, Амин Насер.
Тој рече дека очекува нафтениот пазар да се затегне откако потрошувачите ги потрошија залихите за 400 милиони барели во последните две години, оставајќи го слободниот капацитет на ОПЕК како главен извор на дополнителна понуда за да се задоволи зголемената побарувачка, објави Ројтерс.
Нападите на Хутите на бродовите во Црвеното Море принудија многу компании да го пренасочат превозот низ Африка. Хутите поддржани од Иран велат дека се солидаризираат со Палестинците кои трпат израелски напади во Газа.
„Доколку е краткорочно, танкери може да бидат достапни, но ако е долгорочно, може да биде проблем. Ќе бидат потребни повеќе танкери ако треба да одат на подолги патувања“, рече Насер на маргините на годишниот Светски економски форум во Давос.
Контејнерските бродови го прекинаа преминот низ Суецкиот канал и Црвеното Море, најбрзата рута меѓу Азија и Европа, низ која минуваат околу 12 отсто од бродовите во светот. Алтернативната рута околу Р’тот Добра Надеж во Јужна Африка трае десет до 14 дена подолго.