Производителите на бакар предупредија на нова нестабилност на цените на металот, што е клучно за транзицијата на чиста енергија, додека индустријата се собира на најголемиот годишен настан, неделата на Лондонската берза на метали.
Чилеанскиот производител на бакар Антофагаст рече дека постои „неусогласеност“ меѓу побарувачката за бакар и владините политики кои не издаваат дозволи за нови рудници доволно брзо, пренесува Фајненшл тајмс.
Компанијата посочува дека светот ќе мора да го зголеми производството еквивалентно на целото производство на бакар во Чиле во следната деценија, во спротивно постои ризик да се одложи енергетската транзиција.
Очекуваниот недостиг на бакар, кој се користи во електричните мрежи и електричните автомобили, значи дека промените на цените ќе бидат „остри од време на време“.
Минатата недела, бакарот забележа најголем неделен пораст на цената во последните четири месеци, со раст од шест отсто, надминувајќи ги 10.000 долари за тон, откако Кина објави стимулативни мерки за зајакнување на побарувачката во најголемиот светски потрошувач на бакар.
