Претседателот на Светската банка, Аџај Банга, предупреди дека во следните 10 до 15 години, околу 1,2 милијарди млади луѓе би можеле да влезат на пазарот на трудот, додека се очекува да бидат достапни само околу 400 милиони работни места, што укажува на потенцијален недостиг од приближно 800 милиони работни места.
„Зад таа бројка стои млада жена со диплома, но без работа. Млад човек со занает, но без електрична енергија. Генерација која се прашува дали има место за неа. Работата не е само статистика. Работата е достоинство. Тоа е разликата помеѓу млад човек кој може да ја изгради својата иднина и млад човек кој само чека на таа иднина“, рече Банга во говорот пред министрите за финансии и светските лидери на пленарната сесија на Годишните состаноци на Меѓународниот монетарен фонд (ММФ) и Светската банка (СБ) во Бангкок.
Според него, ако потенцијалот на младите луѓе остане неискористен, последиците ќе ги преминат границите на државите, додека отворањето нови можности за вработување би донело пошироки придобивки.