Европската комисија ќе предложи банките, осигурителите и фондовите да ги споделуваат податоците за клиентите со финансиските институции во замена за плаќање. Се наведува создавање програма за размена на финансиски податоци која ги обединува имателите и корисниците на податоци и организациите на потрошувачи, пишува Блумберг.
Тие ќе развијат технички стандарди, правила за управување, компензација, одговорност и решавање спорови за да обезбедат сигурен пристап до податоците.
„Имателите на податоци како што се кредитните институции, осигурителите и другите финансиски институции кои имаат податоци за клиентите не се секогаш обврзани да обезбедат пристап до корисниците на податоци како што се компаниите за финансиска технологија (fintech) или финансиски институции кои обезбедуваат финансиски услуги и развиваат финансиски производи“, наведено во нацрт-текстот.
Од фирмите кои поседуваат податоци ќе се бара да ги споделат со компании кои се членки на програмата за споделување податоци без непотребно одложување во реално време по барање на корисникот.
Ова вклучува информации за условите за хипотека, кредитни или штедни сметки, инвестиции во финансиски инструменти, крипто-средства, пензиски права и обезбедување производи за неживотно осигурување.
За возврат, сопствениците на податоци, како што се банките и осигурителите, би можеле да бараат „разумна компензација“ за техничката работа потребна за да се овозможи споделувањето, според нацрт-регулативата, која сè уште е предмет на промена пред очекуваното објавување на 28 јуни. За малите и средни претпријатија, надоместокот треба да ги покрие само трошоците за олеснување на пристапот.
„Главната цел на овој предлог е да се промовира дигиталната трансформација и да се забрза усвојувањето на деловни модели водени од податоци во финансискиот сектор на ЕУ со цел да се подобрат економските резултати за корисниците на финансиски услуги и фирмите во финансискиот сектор“, се вели во текстот.
Предлогот исто така ќе има за цел да обезбеди ефективна контрола на клиентите врз нивните податоци. Финансиските фирми кои поседуваат такви информации мора да им ги направат достапни „без непотребно одлагање, бесплатно, континуирано и во реално време“.