Администрацијата на Доналд Трамп ја засили својата кампања против претседателот на Федералните резерви, Џером Пауел, а нивниот конфликт достигна кулминација во четврток.
Само две недели откако претседателот Трамп испрати рачно напишано писмо до Пауел барајќи намалување на каматните стапки, Расел Воут, директор на Канцеларијата за управување и буџет, го обвини шефот на Федералните резерви дека го лажел Конгресот, меѓу другото, за деталите од планот за реновирање на Федералните резерви вреден околу 2,5 милијарди долари.
„Претседателот е исклучително загрижен за вашето управување со Федералниот резервен систем. Наместо да се обидувате да ја стабилизирате финансиската состојба на Федералните резерви, вие продолживте со раскошно реновирање на вашето седиште во Вашингтон“, напиша Воут во писмо што подоцна го објави на социјалните медиуми.
Трамп, потсетува Си-Ен-Ен, со месеци го напаѓа Пауел, кого го назначи за време на неговиот прв мандат, нарекувајќи го со погрдни имиња. Во последно време, претседателот го нарекува „Премногу доцна“ затоа што не ја препозна инфлациската криза од 2022 година доволно брзо и затоа што не ги намали каматните стапки откако инфлацијата почна да се намалува.
Порано овој месец, тој предложи на социјалните медиуми Пауел да поднесе оставка.
Додека, на пример, Европската централна банка и Централната банка на Мексико ја намалија својата референтна каматна стапка неколку пати оваа година, Федералните резерви сè уште не го сториле тоа.
Една од главните причини за ова се големите промени во политиката што се случија откако Трамп се врати во Белата куќа. Претставниците на Федералните резерви рекоа дека прво сакаат да видат како промените ќе влијаат на економијата пред да размислат за понатамошно намалување на каматните стапки.
Пауел, од своја страна, се воздржува од одговор на острите критики на Трамп, нагласувајќи дека Федералните резерви се фокусирани исклучиво на успешно потиснување на инфлацијата и зачувување на здравјето на пазарот на трудот.
Најновите критики за растечките трошоци за обнова на седиштето на Федералните резерви би можеле да укажуваат дека администрацијата бара начин да го оправда отстранувањето на Пауел, според Ед Милс, политички аналитичар во „Рејмонд Џејмс“.
„Врховниот суд многу јасно стави до знаење во своите одлуки дека нема да ја поддржи одлуката на претседателот да го отстрани Пауел“, рече Милс, додавајќи дека тие мора да најдат правна основа за отстранувањето или да создадат доволно негативна средина за претседателот на Федералните резерви сам да се повлече.