Филантропската фондација на извршниот директор на Амазон Џеф Безос, вредна 10 милијарди долари, престана да го финансира водечкиот глобален стандард за доброволна климатска акција, што се толкува како последен обид на милијардерот да избегне иритација на американскиот претседател Доналд Трамп.
Според извори запознаени со ситуацијата, Bezos Earth Fund ја суспендирал поддршката за иницијативата на научно засновани цели (SBTi), организација која им помага на компаниите како Apple и H&M да постигнат веродостојна ознака за „нето нула“ емисија на јаглерод, пишува Financial Times.
Одлуката доаѓа откако вработените во SBTi минатата година изразија загриженост за влијанието на Bezos Earth Fund, како и по медиумските извештаи дека Фондот Безос и советниците на поранешниот американски претставник за климата Џон Кери ја поддржале иницијативата да и се дозволи на организацијата пошироко да ги користи контроверзните кредити за јаглерод.
Два извори запознаени со финансиските зделки веруваат дека прекинот на финансирањето на SBTi по декември 2024 година беше делумно мотивиран од желбата на Безос да не го антагонизира Трамп, кој постојано тврдеше дека климатските промени се измама.
Безос, како и другите технолошки магнати како извршниот директор на Фејсбук, Марк Цукерберг, брзо воспоставува врски со администрацијата на Трамп бидејќи технолошките гиганти се соочуваат со притисок поради антимонополските истраги, аквизиции и регулирање на вештачката интелигенција.
„Порано технолошките милијардери основаа фондации и инвестираа во климатски проекти. „Сега, секој што има нешто да изгуби треба двапати да размисли пред да се вклучи во климатски иницијативи во САД“, рече еден од изворите.
Од друга страна, самата организација SBTi се обиде да се огради од влијанието на фондацијата Безос. Според изворите, SBTi веќе некое време работи на диверзификација на своите извори на финансирање и разгледува други опции. Како одговор на овие тврдења, Фондацијата Безос нагласи дека останува посветена на својата мисија.