Битиќи и Петров од Израел: Примената на модерни технологии носи поголема продуктивност и конкурентност

12

Заменикот на претседателот на Владата задолжен за економски прашања, координација на економските ресори и инвестиции, Фатмир Битиќи и директорот на  Фондот за иновации и технолошки развој Коста Петров, во рамките на работната посета на Израел, остварија средба со министерот за земјоделство и рурален развој, Одед Форер, со кого разговараа за продлабочување на економската соработка помеѓу двете земји.

Вицепремиерот Битиќи го честиташе формирањето на новата Влада на Израел и му посака многу успех на министерот Форер на новата позиција, при што нагласи дека се надева дека ќе се продлабочува економската соработка помеѓу двете земји.

Тој истакна дека постои голем потенцијал за зголемување на меѓусебната трговска размена во повеќе сектори и притоа изрази очекување за помош од Израел во пренесување на искуства и знаења за примена на современи и модерни технологии за развој на земјоделството, кое беше истакнато како еден од секторите во кои може да се интензивира соработката.

Вицепремиерот Битиќи, министерот Форер и директорот Петров, на состанокот се согласија дека примената на новите технологии во земјоделството, но и во останатите сектори, може да донесат повисока продуктивност, конкурентност и создавање на додадена вредност, што би можело да биде импулс за зголемување на меѓусебната размена.

Вицепремиерот Битиќи и директорот Петров, за време на првиот ден од работната посета на Израел, остварија посета и на Азриели инженерскиот колеџ (Azrieli College of Engineering) во Ерусалим, како и на Атобе Акцелераторот (AtoBe Accelerator) – кој е формиран во рамките на Универзитетот и важи за еден од најдобрите центри за истражување и развој во земјата. За време на средбите со претставниците на универзитетот Азриели и бизнис акцелераторот Атобе, вицепремиерот и директорот се информираа за активностите кои се спроведуваат во овие институции и разменија искуства за креирање на можности за поддршка на старт-ап компаниите и унапредување на бизнис климата за стимулирање на иновации.