Фото: Pixabay
Деловните настани претставуваат одличен начин компанијата да го презентира своето работење пред поголем аудиториум. Затоа, организацијата на деловен настан значи голема внимателност, запазување дури и на најситните детали, синхронизирање на повеќе работи или луѓе во исто време. За да немате главоболки при организирање на еден настан, прочитајте ги советите што следуваат…
Дефинирајте ја публиката на која ѝ се обраќате
Јасно е дека целото случување е наменето за публиката, па затоа прва задача нека биде утврдување на нејзиниот состав. Дали се работи за академска заедница, млади луѓе, стручни лица, експерти од земјата и странство, соработници, потенцијални клиенти… Штом знаете кому се обраќате, ќе ви биде многу полесно да ги обезбедите потребните услови за организирање на настанот.
Нема небитни детали
Иако понекогаш постојат работи што ни се чинат неважни, кога станува збор за организирање на еден настан, не ги гледајте како губење време, туку како разгледување на сите можни сценарија. Направете долга листа на сите работи што ќе ви паднат напамет… наоѓање соодветен простор, дали е достапен за вашите гости, дали има паркинг простор, кое озвучување и осветлување е најсоодветно, дали ќе има простор за седење или гостите ќе стојат, колку време ќе трае настанот, дали ќе се послужува храна…
Изберете соодветен термин
Времето и местото во голема мера му “пресудуваат“ на настанот, односно соодветниот избран термин и место го прават настанот успешен или не. При избор на соодветен тајминг, земете го предвид животниот стил и начин на живот на гостите. Исто така, водете сметка дали пред, за време или по тој настан, има некој друг важен настан што би можел да ви ја “земе“ публиката и вниманието.
Поентирајте со конкретна цел
Не заборавајте дека луѓето кои се поканети, одвоиле дел од своите време, за да дојдат на вашиот настан. Затоа, бидете конкретни, прецизни, имајте јасна цел што сакате да ја поставите и не дозволувајте луѓето да почувствуваат дека дошле залудно.
