BMW ќе инвестира една милијарда евра во фабриката во Штајр во Австрија до 2030 година, за да обезбеди развој и производство на следната генерација на електрични погонски единици почнувајќи од 2025 година, соопшти баварскиот производител.
Оваа сума вклучува инвестиција од околу 710 милиони евра само во производниот сектор, во фабрика која ќе снабдува витални компоненти за нови електрични погонски системи, вклучувајќи ротор, статор, пренос, инвертер и куќиште, во две производни линии.
BMW, како и неговите ривали како што се Mercedes-Benz и Volvo, инвестираат многу во производството и развојот на електричен погон, што е клучно за зачувување на идентитетот на брендот во транзицијата кон електрификација.
„Bayerische Motoren Werke“ отсекогаш бил синоним за најдобрите погонски единици на пазарот“, изјави портпаролот на германската марка. „Нашата јасна цел е да го пренесеме ова во ерата на делумни и чисти електрични погонски системи“.
Оваа фабрика развива и склопува мотори со внатрешно согорување за BMW и Mini повеќе од 40 години.
„Годините на искуство и богатата експертиза во погонските агрегати ја прават фабриката на BMW во Штајр идеална локација за одржлива мобилност во иднината“, додаваат од BMW.
Оваа инвестиција ќе придонесе за зголемување на капацитетот на оваа фабрика на повеќе од 600.000 единици, посочија од компанијата.
Во моментов, една третина од вработените во ИТ секторот на фабриката работат во електричниот оддел. Тој процент ќе се искачи на 90 проценти до крајот на деценијата.
BMW моментално склопува мотори во Динголфинг, па локацијата во Австрија ќе биде втора во областа.
