Американски Boeing и европски Airbus жестоко се натпреваруваат еден со друг во производството на авиони, но овој пат се согласија за еден проблем – можноста телекомуникациските мрежи од следната 5G генерација да влијаат на безбедноста на авионите.
Поради оваа причина, шефовите на овие компании, извршниот директор на Boeing, Дејв Калхун и извршниот директор на Airbus Americas Inc – Џефри Кнител испратија заедничко писмо до администрацијата на Бајден.
Примач на писмото бил Пит Бутиџиг, министер за транспорт.
Можни пречки
Во ова писмо, шефовите на големите производители на авиони посочуваат дека лансирањето на мрежата 5G во опсегот C (фреквентен опсег помеѓу 3,7 и 4,2 GHz), планирано за 5 јануари следната година, може да ја загрози безбедноста на авионите. Според нив, можното мешање на 5G мрежата во овој опсег со чувствителни авионски инструменти, пред се со радарски висиномери, може да има значително негативно влијание врз целата воздухопловна индустрија.
Со нив се согласува и американската агенција за воздухопловство ФАА, која претходно овој месец предупреди за можноста од споменатите пречки. Тие се во постојани преговори со телекомуникациската агенција FCC, со која бараат начин да ја прошират достапноста на 5G мрежите на безбеден начин.
За да се реши овој проблем, американските телекомуникациски оператори AT&T и Verizon минатиот месец се согласија да го одложат лансирањето на новата 5G мрежа до јануари следната година. Ова може да им даде доволно време на регулаторите да преземат мерки за да спречат несакани пречки.
Сепак, претставниците на воздухопловната индустрија сега велат дека не е доволно направено во овој поглед и предлагаат 5G сигналите во спектарот C да бидат ограничени во близина на аеродромите и другите критични места.
Претходно и United Airlines ја поддржа иницијативата, наведувајќи дека воведувањето на 5G мрежите, како што предложија операторите, ќе спречи употреба на радарски висинометри на околу 40 најголеми американски аеродроми.
Здружението на пилоти, исто така, верува дека застојот во преговорите меѓу воздухопловните и телекомуникациските регулатори претставува проблем за патниците, превозниците и економијата на САД.
