Бразилскиот претседател Луиз Инасио Лула да Силва изјави дека планира да ги покани лидерите на Кина и Индија за да разговараат за заедничкиот одговор на групата БРИКС на царините што им ги наметна американскиот претседател Доналд Трамп, објави Ројтерс.
„Претседателот Трамп сака премолчено да го демонтира мултилатерализмот, во кој договорите се создаваат колективно во соработка со институциите, и да ги замени со унилатерализам, каде што може да преговара со земјите еден на еден“, рече Лула.
Тој оцени дека „мала латиноамериканска земја“ не може да има никаква преговарачка моќ против Соединетите Американски Држави.
„Ќе се обидам да разговарам со лидерите (на земјите-членки на БРИКС) за тоа како поединечно се справуваме во овие ситуации, какви импликации трпи секоја земја, со цел да се постигне решение. Важно е да се запомни дека десет земји-членки на БРИКС се исто така во групата Г20“, рече Лула.
Трамп потпиша извршна наредба со која се воведува дополнителна царина од 25 проценти за стоки од Индија, што ќе ја доведе вкупната царинска стапка на 50 проценти, наведувајќи го фактот дека земјата директно или индиректно увезува нафта од Русија.
Со новите давачки, Индија се приклучува на Бразил како земја соочена со највисоки царински стапки, ставајќи ја во неповолна положба во споредба со регионалните конкуренти како што се Виетнам и Бангладеш.