Бугарија и Грција ги здружуваат силите за снабдување на регионот со гас

16

Бугарија и Грција се договорија да ја истражат можноста за заеднички испораки на гас за Југоисточна Европа и да ја намалат нивната зависност од рускиот гас за време на војната во Украина, изјави бугарскиот министер за енергетика Александар Николов.
Газпром на 27 април ја прекина испораката на гас за Бугарија, што задоволуваше повеќе од 90 отсто од потребите за гас, како и Полска, откако официјална Софија одби да плаќа во рубљи.

Оваа балканска земја, поддржана од Европската комисија, сега се залага за регионална соработка која би вклучила подобра употреба на инфраструктурата за гас и електрична енергија, како и заеднички набавки на гас од ЕУ за да се намали зависноста од рускиот увоз.

Софија е домаќин на работната група на ЕУ за следење на снабдувањето со гас во регионот, која вчера го одржа првиот состанок. Исто така, е домаќин на форум на енергетски претставници од Грција, Романија, Турција, Србија, Северна Македонија, Украина и Азербејџан.

Бугарија, која во моментов транспортира руски гас до Србија и Унгарија, може да транспортира и повеќе од 20 милијарди кубни метри гас годишно преку својата гасоводна мрежа на север до остатокот од Европа, рече вицепремиерот Асен Василев.

„Верувам дека со нашите заеднички напори, со постоечката инфраструктура и малите надградби, можеме значително да го диверзифицираме енергетскиот регион и да ја прекинеме зависноста (од Русија) еднаш засекогаш“, рече Василев на форумот.

Бугарскиот снабдувач со гас Булгаргаз и грчката компанија за гас ДЕПА ќе бараат можности за снабдување со гас во регионот, рече министерот за енергетика Александар Николов.

Двете компании се согласија да започнат заедничко купување на течен природен гас (ТНГ), што треба да ја зајакне нивната преговарачка позиција, изјави за новинарите грчкиот министер за енергетика Костас Скрекас.

Грција планира наскоро да го удвои капацитетот за складирање на нејзиниот единствен терминал TПГ во Ревитуса во близина на Атина и да изгради нов терминал за течен природен гас во Александрополис до крајот на 2023 година, рече Скрекас.

Гасниот интерконектор ИГБ меѓу двете земји, кој ќе транспортира гас од терминалот ТПГ и азербејџанскиот гасовод до Бугарија, треба да профункционира во јули, додаде грчкиот министер.