Три години криза ја погоди германската економија, а закрепнувањето сега е забавено од ефектите на силната и постојана инфлација, се вели во новиот извештај за прогноза на Бундесбанк.
„Инфлацијата … ја слабее куповната моќ на граѓаните“, рече претседателот на германската централна банка Јоаким Нагел при претставувањето на извештајот во петокот.
Бундесбанк очекува дека економијата полека ќе закрепнува, но дека по два зимски квартали во рецесија, на крајот на годината ќе забележи раст од 0,3 отсто.
Новата прогноза е помалку песимистичка од онаа во декември, најмногу поради релаксација на енергетскиот пазар. Пред половина година банката најави рецесија од 0,5 отсто за 2023 година.
Економистите од Бундесбанк, сепак, не алармираат и покрај повлекувањето на инфлацијата во последните месеци. Имено, цените на мало продолжуваат да растат и надвор од најважните фактори – енергијата и храната. Со други зборови, базичната инфлација се покажува како силна и упорна.
За годинава банката предвидува пад на стапката на инфлација до шест отсто, по 8,7 отсто во 2022 година.
Европската централна банка (ЕЦБ) се стреми да ја задржи инфлацијата во еврозоната на два отсто, што го смета за показател за стабилни цени.
Бундесбанк сега смета дека забавувањето на инфлацијата заедно со корекција на платите ќе овозможат закрепнување на куповната моќ на потрошувачите, еден од столбовите на економскиот раст.
Од друга страна, ЕЦБ во четвртокот повторно ја зголеми основната каматна стапка, осми пат од минатото лето и најмногу од воведувањето на заедничката валута.
