Германската економска активност најмногу ќе стагнира во третиот квартал, предвидува во понеделник централната банка Бундесбанк во својот најнов месечен извештај.
Активноста во најголемата европска економија стагнира од пролетта, закрепнувајќи од кратката техничка рецесија во два квартали во текот на зимските месеци.
Германската централна банка, сепак, предвидува дека инфлацијата во Германија ќе продолжи да паѓа во наредните месеци поради падот на цените на енергијата.
Минатогодишниот шок на цената на енергијата предизвикан од последиците од руската инвазија на Украина предизвика енергетска криза во Германија и придонесе за скок на инфлацијата на глобално ниво.
Во последниот извештај, Бундесбанк процени дека личната потрошувачка во Германија најверојатно ќе биде силна поради стабилните бројки за вработеноста, силниот раст на платите и пониската инфлација. Сепак, слабата странска побарувачка за германски стоки веројатно ќе продолжи да влијае на индустриското производство во извозно ориентираната економија на Германија, велат тие.
Понатаму, од централната банка велат дека повисоките каматни стапки ја намалиле побарувачката во градежниот сектор и за капиталните производи.
Слабата странска побарувачка во комбинација со повисоките трошоци за финансирање, исто така, влијаеше на германската економија во вториот квартал, намалувајќи ги надежите за брзо закрепнување на германската економија која паѓа, според Бундесбанк.
Како што напишаа аналитичарите на централната банка, иако инфлацијата ќе се намали, силниот раст на платите веројатно ќе ја задржи над нивото од два проценти на подолг рок. Централната банка на Германија за оваа година предвидува инфлација од шест отсто, по што во 2024 година би требало да падне на 3,1 отсто.
