Кинескиот производител на електрични возила BYD е во преговори со Stellantis и други европски автомобилски компании за можно преземање на недоволно искористени фабрики во Европа, објави Bloomberg.
Информацијата ја потврди извршната потпретседателка на BYD, Стела Ли, наведувајќи дека кинеската компанија разгледува потенцијални договори за преземање на производствени капацитети во земји како Италија.
Најголемиот светски производител на електрични автомобили со тоа дополнително го забрзува своето проширување на европскиот пазар во време кога побарувачката за електрични возила расте, но и притисок од европските производители кои се соочуваат со помало искористување на капацитетите и сè посилна кинеска конкуренција.
„Многу е тешко да се формираат партнерства и постојано да се бара дозвола од другата страна. Претпочитаме сами да ги управуваме сите процеси“, изјави Стела Ли на конференцијата на Financial Times за иднината на автомобилската индустрија во Лондон.
Таа додаде дека BYD соработува со бројни производители на автомобили преку продажба на батерии и други деловни сегменти, но не и преку заедничко производство на возила.
Изјавата доаѓа само неколку дена откако Stellantis и кинескиот Leapmotor објавија планови за заедничко производство на автомобили во Европа.
Кинеските компании сè поагресивно влегуваат во европската автомобилска индустрија
Од почетокот на енергетската криза и зголемувањето на цените на горивата, интересот за електрични возила дополнително се зголеми, што им користи на кинеските производители кои агресивно го прошируваат своето присуство надвор од домашниот пазар.
BYD во последните години бележи силен раст на продажбата во Европа, а во исто време се обидува да ја намали својата зависност од кинескиот пазар, кој е оптоварен со ценовни војни меѓу домашните производители.
Потенцијалните преземања на европски фабрики би можеле да ѝ овозможат на кинеската компанија да заобиколи дел од трговските и царинските притисоци, но и да го приближи производството до европските клиенти.
За европската автомобилска индустрија, ова е дополнителен сигнал за забрзаната трансформација на пазарот, каде што кинеските производители повеќе не се само извозници на поевтини електрични возила, туку се посериозни конкуренти подготвени да ги преземат производствените капацитети и да изградат долгорочно присуство во Европа.
Stellantis не сакаше да коментира за наводите за преговорите, објаснувајќи дека компанијата не коментира за пазарните шпекулации и дека редовно разговара со разни учесници во секторот како дел од своите деловни активности.