Цените на среброто скокнаа во петокот кон 101 долар, достигнувајќи нов рекорден максимум под влијание на зголемената побарувачка на инвеститорите за скапоцени метали во услови на геополитички тензии.
Од почетокот на годината, цената на среброто се зголеми за речиси 40 проценти, а во последната година нејзината цена е повеќе од двојно зголемена.
Унца злато изнесуваше 4.986,06 долари на физичкиот пазар и беше за 1,01 процент поскапа отколку на затворањето на тргувањето вчера. Златото се тргуваше по цена од 0,5 проценти повисока, на 4.936,00 долари, во фјучерсни договори за испорака во февруари.
Минатата година, цените на среброто пораснаа многу посилно од цените на златото, поттикнати од континуираната ограничена понуда на Лондонската берза, потсетува Ројтерс.
Заедно со зголемената побарувачка на централните банки за злато, цената на скапоцените метали оваа година беше поттикната од геополитичките тензии. На почетокот на јануари, американските сили ја нападнаа Венецуела и го заробија претседателот Николас Мадуро. Кабинетот на претседателот Доналд Трамп повторно ги сигнализираше своите претензии кон Гренланд, данската автономна територија.
Тензиите околу Гренланд се намалија кон средината на неделата откако Трамп во Давос ја повлече својата закана за царини за група европски земји кои ја поддржуваа Данска и нејзиното инсистирање на суверенитет над Гренланд.