Светските цени на храната паднаа петти месец по ред во јануари, додека глобалните залихи на житарки се приближуваат до рекордно високо ниво, објави денес Организацијата за храна и земјоделство на Обединетите нации (ФАО).
Индексот на цените на храната на ФАО, кој ги следи месечните движења на цените на основните земјоделски производи на светскиот пазар, во јануари во просек изнесуваше 123,9 поени, што е за 0,4 проценти помалку отколку во декември и за 0,6 проценти пониско отколку пред една година.
Цените на житарките малку се зголемија за 0,2 проценти во споредба со претходниот месец, и покрај малиот пад на цените на пченицата и пченката.
Високото ниво на залихи на пченица ги неутрализираше временските проблеми во Русија и САД, додека солидните глобални залихи на пченка ги ублажија ефектите од неповолните временски услови во Аргентина и Бразил, како и силната побарувачка за етанол во САД.
Индексот на цените на растителното масло се зголеми за 2,1 процент во јануари.
Зголемувањето на цените на палминото масло беше поврзано со сезонско забавување на производството во Југоисточна Азија и стабилна глобална побарувачка, додека цените на соиното масло се зајакнаа поради намалената понуда од Јужна Америка и очекувањата за силна побарувачка од американскиот сектор за биогорива.
Цените на месото се намалија за 0,4 проценти во јануари, првенствено поради пониските цени на свинското месо, со изобилство на глобална понуда и послаба меѓународна побарувачка.
Најизразен пад е забележан кај млечните производи, чиј индекс се намали за пет проценти во споредба со декември, поради пониските цени на сирењето и путерот.
Индексот на цените на шеќерот падна за еден процент, поради очекуваното зголемување на понудата, особено поради закрепнувањето на производството во Индија и поволните перспективи во Бразил и Тајланд.
Во исто време, ФАО објави и нови проценки за глобалното производство на житни култури во 2025 година, кое треба да достигне рекордни 3,023 милијарди тони, со историски високи приноси на пченица, груби зрна и ориз.
Врз основа на ажурираните прогнози, глобалните залихи на житни култури би можеле да се зголемат за 7,8 проценти и да достигнат рекордно високо ниво, се додава во извештајот на веб-страницата на ФАО.