На светските пазари, цените на нафтата и минатата недела малку пораснаа, по втор пат по ред, бидејќи се очекува намалување на каматните стапки во САД и бидејќи геополитичките тензии би можеле да ја намалат понудата од Русија и Венецуела.
Цената на барел на лондонскиот пазар минатата недела се зголеми за 0,9 проценти, на 63,75 долари, додека на американскиот пазар, барелот порасна за 2,6 проценти, на 60,08 долари.
Очекувања за намалување на каматните стапки
Растот на цените втора недела по ред ја поддржува верувањето на трговците дека поради слабоста на економијата, американската централна банка дополнително ќе ги намали каматните стапки за 0,25 процентни поени оваа недела, како што направи во септември и октомври.
Ова треба да го стимулира растот на економијата, како и побарувачката за нафта.
Дополнително, цените на нафтата се поддржани од геополитичките тензии бидејќи САД распоредуваат воени бродови во близина на Венецуела. Претседателот Доналд Трамп неодамна изјави дека би можел да го затвори воздушниот простор на Венецуела како дел од борбата против трговијата со дрога.
Губењето на венецуелски барели во случај на воена интервенција на САД значително би влијаело на цените бидејќи пазарот ќе мора да најде замена, предупредуваат аналитичарите на „Ристад енерџи“, кои истакнуваат дека Венецуела во моментов произведува околу 1,1 милион барели дневно.
Нови мерки против руската нафта
Во петокот, цените беа поддржани од веста дека групата Г7 и Европската Унија би можеле да го заменат ограничувањето на цената за руската нафта со забрана за транспорт.
Имено, ограничувањето им забрануваше на превозниците и осигурителите да сервисираат руска нафта поскапа од 60 долари за барел, а бидејќи Русија транспортира повеќе од една третина од својата нафта во западни танкери, користејќи ги услугите на западните шпедитери, забраната би ја прекинала таа трговија.
Дополнително, нема напредок во разговорите меѓу САД и Русија за мир во Украина.
Фактот дека нема напредок во овие разговори ги поддржува цените на нафтата, но од друга страна, зголеменото производство на Организацијата на земјите извознички на нафта (ОПЕК) и нејзините партнери спречува значително зголемување на цените.
„Поради овие две спротивставени сили, пазарите на нафта се доста мирни“, вели Тамас Варга, аналитичар во PVM.