На светските пазари, цените на нафтата останаа речиси непроменети минатата недела, бидејќи трговците се загрижени за поголема понуда од побарувачка, па затоа не беа особено охрабрени од намалувањето на каматните стапки од страна на американската централна банка.
Цената на барел на лондонскиот пазар минатата недела се лизна за 0,5 проценти, на 66,68 долари, додека цената на барел на американскиот пазар остана речиси непроменета, на 62,68 долари.
Трговците беа фокусирани на минатонеделниот состанок на лидерите на ФЕД, кои во среда одлучија да ги намалат каматните стапки за 0,25 процентни поени, во опсег од 4,00 до 4,25 проценти, со цел да го поддржат пазарот на трудот, кој во последно време слабее, и да го стимулираат економскиот раст.
Сепак, трговците беа загрижени за намалувањето на проценките за растот на американската економија. Имено, лидерите на ФЕД проценуваат дека таа ќе порасне само за 1,6 проценти оваа година, додека минатогодишниот раст беше 2,8 проценти.
Лидерите на ФЕД очекуваат да ги намалат каматните стапки барем уште еднаш до крајот на годината. Пониските трошоци за задолжување обично ја поттикнуваат економската активност, а со тоа и побарувачката за енергија, но инвеститорите беа повеќе загрижени од намалените економски прогнози на ФЕД.
„Побарувачката ќе се зајакне по намалувањето на каматните стапки во САД“, рече кувајтскиот министер за нафта, Тарик ал-Руми, но аналитичарите се скептични и предупредуваат дека главниот мотив на ФЕД за намалување на каматните стапки е забавувањето на економската активност.
„ФЕД ги намали каматните стапки бидејќи е сосема јасно дека економијата забавува“, вели Хорхе Монтепеке од Оникс Капитал Груп.
И додека растот на САД и другите големи светски економии е забавен, поради што побарувачката за нафта не расте толку брзо како што се очекуваше, Организацијата на земјите извознички на нафта (ОПЕК) и нејзините партнери го зголемуваат производството веќе долго време. А тоа значи дека понудата расте побрзо од побарувачката, па затоа цените на нафтата се под притисок.
Цените се исто така под притисок затоа што американскиот претседател Доналд Трамп минатата недела изјави дека е посклоен да го зголеми притисокот врз Русија со пониски цени на нафтата отколку со нови санкции, со цел да се стави крај на конфликтот во Украина.