Цената на барелот на лондонскиот пазар минатата недела падна за 1,5 отсто, на 74,66 долари, додека на американскиот пазар барелот поевтини за 2,1 отсто, на 71,00 долари.
Од почетокот на неделата пазарите се под притисок бидејќи Трамп прво нареди воведување, а потоа и одложување на царините за увоз од Канада и Мексико. Тој воведе царини и за увоз од Кина, но не ги одложи, па Кина возврати со објавување царини за одредени американски производи, вклучително и нафта и гас.
Поради ова, трговците стравуваат од трговска војна меѓу двете најголеми светски економии, што негативно ќе влијае на глобалниот економски раст и побарувачката за енергија.
Хаос на пазарите
„Хаосот на Трамп во тарифната политика и трговската војна не се добри за глобалниот економски раст и побарувачката за нафта. Исклучително каприциозните потези на американскиот претседател се штетни за економскиот раст, што веројатно ќе ги намалат деловните инвестиции и личната потрошувачка“, вели Бјарне Шилдроп од СЕБ.
Притисокот врз цената на нафтата е резултат и на одлуката на Организацијата на земјите извознички на нафта (ОПЕК) и нејзините сојузници да го зголемат производството од почетокот на април. Имајќи предвид дека побарувачката не е баш импресивна, се чини дека ОПЕК има намера да ја следи неодамнешната порака на Трамп дека цената на нафтата треба да биде пониска.
Покрај тоа, американскиот претседател повтори дека планира да го зголеми домашното производство.