Пo две недели раст, цената на суровата нафта на глобалниот пазар падна за приближно еден процент минатата недела, бидејќи пазарот очекува уште едно големо зголемување на производството од страна на членовите на нафтениот картел ОПЕК+.
Барел нафта од типот Брент на лондонскиот пазар ја заврши неделата на 64,78 долари, или 0,96 проценти помалку во однос на претходната недела. Во исто време, барел WTI на американскиот пазар изнесуваше 61,76 долари или 1,17 проценти помалку.
ОПЕК+, кој ги вклучува членовите на Организацијата на земјите извознички на нафта и сојузниците предводени од Русија, одржува состанок оваа недела, на кој се очекува да резултира со уште едно зголемување на производството од 411.000 барели дневно во јули.
Ројтерс претходно овој месец објави дека картелот би можел да го откаже остатокот од доброволното намалување на производството од 2,2 милиони барели дневно до крајот на октомври, откако веќе ја зголеми својата производствена цел за околу 1 милион барели дневно за април, мај и јуни.
„Брент е во пад поради очекувањето дека ОПЕК+ ќе ја зголеми својата производствена квота за дополнителни 411.000 барели дневно во јули“, забележа аналитичарот на СЕБ, Бјарне Шилдроп.