Инфлацијата во Грција повторно е во пораст, а најновите податоци на ЕЛСТАТ покажуваат дека притисоците од енергетскиот сектор и глобалните настани сè повеќе се прелеваат врз секојдневните трошоци на граѓаните.
Според официјалната статистика, потрошувачките цени се зголемиле за 2,6 проценти во март во споредба со претходниот месец, додека годишната инфлација достигнала 3,9 проценти.
Иако зголемувањето на цените е евидентирано во неколку категории, клучниот генератор на зголемувањето на цените останува енергијата, односно горивата.
Најголем скок е забележан во тој сегмент – цените на дизелот се зголемиле за 24,1 процент, бензинот за 11,4 проценти, додека другите горива се зголемиле за речиси 20 проценти. Како резултат на тоа, трошоците за транспорт се зголемиле за 7,3 проценти, а се издвојуваат и авионските билети, кои се дури 26,2 проценти поскапи на месечна основа.
Зголемувањето на цените на горивата е директно поврзано со нарушувањата на глобалните пазари и нестабилноста на Блискиот Исток, што дополнително ги оптоварува економиите што зависат од увоз на енергија, како што е Грција.
Во прехранбениот сектор, растот на цените е умерен, но присутен. Јогуртот, овошјето и зеленчукот најмногу поскапеа, додека во исто време некои производи поевтинија – тестенините, говедското месо, рибата и маслото за јадење. Овие трендови укажуваат на комбинација од сезонски фактори и промени во синџирите на снабдување.
Особено изразен месечен раст е забележан кај облеката и обувките, каде што цените се зголемија за 21,9 проценти. Сепак, аналитичарите делумно го припишуваат овој скок на крајот на сезонските попусти и враќањето на редовните нивоа на цените.
Во поширокиот економски контекст, растечката инфлација доаѓа во чувствителен момент за Грција, која во голема мера се потпира на туризмот. Повисоките цени за превоз и авионски билети би можеле да влијаат на интересот на туристите, но и на вкупната потрошувачка во текот на претстојната летна сезона.
Експертите предупредуваат дека понатамошниот развој на ситуацијата во голема мера би зависел од движењето на цените на енергијата на светскиот пазар. Доколку притисоците продолжат, реално е да се очекуваат дополнителни зголемувања на цените во неколку сектори, што би можело дополнително да ги оптовари буџетите на домаќинствата и да го забави економското закрепнување.