Централните банки ширум светот, кои имаат девизни резерви во вкупна вредност од илјадници милијарди долари, сè повеќе размислуваат за повлекување од доларот и преминување кон злато, евро и кинески јуан. Ова поместување се случува како резултат на нарушените трговски односи и геополитичките превирања што поттикнуваат преиспитување на паричните текови на глобално ниво.
Според извештајот на Форумот на официјални монетарни и финансиски институции (OMFIF), кој беше објавен во вторник, една од три централни банки (од 75 анкетирани, кои управуваат со вкупно околу 5 трилиони долари резерви) планираат да ја зголемат својата изложеност на злато во следната година – две, повеќе од кога било во последните пет години, објавува Ројтерс.
Анкетата, спроведена помеѓу март и мај, е прв поглед на последиците од воведувањето на американските ослободувачки царини на 2 април, кои ги потресоа пазарите и ја намалија вредноста на доларот и американските државни обврзници.
Централните банки брзо купуваат злато веќе некое време, а 40 проценти од нив планираат да ги зголемат своите златни резерви во следните 10 години. „По години рекордно купување, менаџерите на резерви сега ги удвојуваат скапоцените метали“, соопшти OMFIF.
Доларот, кој беше најпосакувана валута минатата година, падна на седмото место оваа година. Дури 70 проценти од централните банки изјавиле дека политичката ситуација во САД ги одвраќа од инвестирање во долар, што е двојно повеќе од минатата година.
Еврото и јуанот се најголемите добитници од ова пренасочување, бидејќи 16 проценти од анкетираните банки планираат да ја зголемат својата изложеност на еврото во следните 12 до 24 месеци (минатата година имаше седум проценти), додека се очекува уште поголем раст за јуанот на подолг рок. Околу 30 проценти од банките планираат да ги зголемат резервите во таа валута, а неговиот глобален удел во девизните резерви би можел да се зголеми тројно на шест проценти.
Три извори вклучени во директни разговори со менаџерите на девизни резерви во централните банки велат дека еврото има потенцијал да го врати уделот што го изгуби за време на должничката криза во 2011 година, од сегашните 20 на околу 25 проценти, до крајот на деценијата. Иако доларот сè уште останува најважната резервна валута (се предвидува дека ќе сочинува 52 проценти од глобалните резерви во 2035 година), во споредба со денешните 58 проценти.
Фото: Pixabay