Регулаторното тело за домување (РТД) објави дека им одзело дозволи на четири компании – управувачи на станбени згради. Оваа мерка е резултат на вонредна, периодична контрола извршена за утврдување дали ги исполнуваат условите врз основа на кои им биле издадени лиценците, преку барање на релевантни информации.
Целта на споменатата контрола, како што беше истакнато од страна на РТД, беше да се соберат податоци за постапувањето во согласност со член 42 од Законот за изменување и дополнување на Законот за домување („Службен весник на Република Македонија“ бр. 160/2025). Овој член предвидуваше управувачите на станбени згради најдоцна во рок од шест месеци од стапувањето во сила на овој закон да го усогласат своето работење со неговите одредби.
Во рамките на извршената проверка, беа опфатени правни лица – управувачи на станбени згради, со седиште во повеќе градови низ земјава, вклучувајќи ги Скопје, Охрид, Прилеп, Тетово, Гостивар, Струмица, Штип, Битола, Кичево, Велес, Куманово, Кочани и Кавадарци.
При контролата, беше утврдено дека 62 правни субјекти го усогласиле своето работење.
„Кај 4 управувачи, од кои 3 се со седиште во Скопје и една во Струмица, констатирани се неправилности, недоставени податоци или неисполнување на законските обврски.“
Еден од управувачите на кои им биле одземени дозволите, повеќе од шест месеци претходно не извршувал дејности над кои Регулаторното тело има надлежност, со што доброволно се откажал од управувањето.
„Две од правните лица – управувачи, по одземањето на лиценците, целосно ги завршија своите обврски согласно Законот за домување, во однос на враќање на средствата од резервниот фонд и изготвување на завршни финансиски извештаи“, изјави Никола Затуроски, претседател на Регулаторната комисија за домување.
Според најновите податоци на РТД, во државата вкупно 8.053 станбени згради се управувани од страна на управувач или од заедница на сопственици. Објекти со лиценцирани управувачи се 5.600, со договори за управување на вкупно 135.338 посебни делови, односно станови и деловни простории. Податоците од Централниот регистар, пак, покажуваат дека до средината на декември минатата година, регистрирани биле 2.453 активни заедници на сопственици.