Високите цени на златото ги принудуваат многумина да се одлучат за поевтини алтернативи како што е платината, која е за 46 проценти поскапа од почетокот на оваа година.
Платината во моментов е непозната ѕвезда на пазарот на скапоцени метали.
Нејзината цена на светскиот пазар достигна износ од 1.272 долари за унца кон средината на минатата недела, што е највисок износ од февруари 2021 година.
Малку подоцна, тој износ беше намален, што е сепак повеќе од една третина од цената на златото за унца.
Побарувачката за платина е особено зголемена во Кина, која увезе 11,5 тони платина во април, што е највисоко во последната година.
Светскиот совет за инвестиции во платина (WPIC) очекува глобалната побарувачка за накит од овој скапоцен метал оваа година да се зголеми за пет проценти.
Сепак, експертите од Банката на Америка предупредија дека зголемувањето на глобалната побарувачка за само еден процент би можело да го удвои дефицитот на овој скапоцен метал.
За разлика од златото, платината е сè побарувана во индустријата. Имено, таа има важна улога во автомобилската индустрија – се користи за производство на каталитички конвертори на издувни гасови на дизел возила. WPIC проценува дека овој сектор учествувал помеѓу 29 и 42 проценти во глобалната побарувачка за платина во последните години.
Понатаму, овој скапоцен метал е потребен во хемиската и електронската индустрија, како и за електролиза во производството на зелен водород. Тоа не е сè – тој делува како катализатор во возилата на горивни ќелии. Експертите веруваат дека водородната економија ќе биде една од главните причини за долгорочното зголемување на побарувачката за платина, пишува tagesschau.
Фото: Pixabay