Производителите на автомобили се собираат за да отворат фабрики на нова локација на Блискиот Исток.
Земја која до неодамна не би била поврзана со автомобилската индустрија е на пат да стане нова автомобилска сила. Саудиска Арабија полека станува фокус на производството на автомобили на Блискиот Исток. Но, како се случи тоа?
Работите започнаа во 2023 година кога Лусид ja отвори Advanced Manufacturing Plant 2 во богатото кралство на Блискиот Исток. Американскиот производител го склопува моделот Air таму користејќи комплети кои се претходно произведени во главната фабрика на компанијата во Каса Гранде, Аризона. Сепак, целта на фабриката е да стане целосно развиен производствен погон до крајот на оваа деценија. Доколку сè оди според планот, фабриката ќе може да произведува до 150.000 возила годишно, кои има намера да ги продава во Саудиска Арабија, како и на извозните пазари, според „Јутарњи.хр“.
Иако фабриката на Лусид не беше големо изненадување со оглед на тоа што Јавниот инвестициски фонд на Саудиска Арабија во тоа време поседуваше над 60 проценти од акциите на американскиот производител на автомобили, новодојденецот сигурно беше. „Хјундаи“ сега започна со изградба на нова фабрика во автомобилскиот кластер „Крал Салман“ во рамките на економскиот град „Крал Абдулах“, нов град во Саудиска Арабија кој беше создаден пред две децении за да привлече инвестиции и да стане логистички и производствен центар на земјата. Тоа ќе стане првата „производствена база“ на компанијата на Блискиот Исток и ќе ги постави „темелите за Хјундаи да стане водечки бренд во Саудиска Арабија“.
Фабриката е предвидено да се отвори во четвртиот квартал од 2026 година, а годишниот производствен капацитет ќе биде 50.000 автомобили. Компанијата не откри кои модели ќе се произведуваат во објектот, но потврди дека ќе произведува електрични возила, како и мотори со внатрешно согорување.
Иако Саудиска Арабија е невообичаено место за производство на автомобили, нејзиниот ултрабогат суверен фонд за богатство ги привлекува производителите на автомобили да отворат фабрики во земјата. Инвестициите се дел од националниот проект за развој познат како Визија 2030, кој има за цел диверзификација на економијата. Како дел од тој напор, Саудиска Арабија сака да биде помалку зависна од производството на нафта, а производството на возила е дел од тој план.