Џонсон: „Северен тек 2“ ја става во опасност стабилноста во регионот

28

Британскиот премиер Борис Џонсон ги повика европските земји да се спротивстават на новиот гасовод меѓу Русија и Германија, предупредувајќи дека тој ризикува да ја поткопа стабилноста во регионот, пишува Блумберг.

Зборувајќи со деловните лидери и дипломати во Лондон додека европските регулатори одлучуваат дали да го одобрат гасоводот „Северен тек 2“, Џонсон не го именуваше проектот, но предупреди на прекумерна зависност од Русија и рече дека Британија „го поддржува суверенитетот и интегритетот на Украина“.

Британската влада претходно соопшти дека делумно се спротивставува на гасоводот затоа што се грижи дека може да ги пренасочи испораките на руски гас преку Украина, лишувајќи ја земјата од транзитни такси во критичен момент.

„Се надеваме дека нашите пријатели можат да разберат дека наскоро има избор – помеѓу протокот на уште повеќе руски јаглеводороди преку новиот џиновски гасовод и застапувањето за Украина и одбраната на каузата за мир и стабилност“, рече Џонсон во говорот во Лондон.

Премиерот ги даде забелешките во време кога Соединетите Држави ги предупредуваат своите европски сојузници дека Русија можеби размислува за потенцијална инвазија на Украина додека растат тензиите меѓу ЕУ и Москва.

Џонсон рече дека Британија не сака да биде „непријателски настроени кон Русија“ поради Украина, но дека има „посветеност на демократијата и слободата што ја дели голем дел од европскиот континент“.

Додаде дека Британија „брзо реагирала“ кога Полска побарала помош за да се справи со „таргетираната криза“ на границата со Белорусија. Режимот на Александар Лукашенко е обвинет дека турка илјадници мигранти да ја преминат границата за да влезат во Европската унија и да ја поткопаат безбедноста.

ЕУ вели дека гледа мешање на Русија во акциите на Лукашенко и неговата влада.