Џонсон: Скокот на цената на гасот е привремен

10

Зголемувањето на светските цени на гасот е привремена појава поврзана со закрепнувањето на светската економија по пандемијата, изјави британскиот премиер Борис Џонсон пред да замине за САД, каде што ќе се сретне со претседателот Џо Бајден и ќе учествува на Генералното собрание на ОН.

“Што се однесува до сегашниот недостиг во снабдување со гас, ова главно се должи на фактот дека светската економија закрепнува, слично како Гуливер кога станува, чии окови паѓаат. Ќе треба време да се задоволи побарувачката“, рече тој.

Британскиот премиер нагласи дека побарувачката за гас е зголемена во целиот свет, особено во Азија, што имаше значително влијание врз цените, но дека британската Влада е “подготвена да го реши овој проблем” и е “целосно уверена во своите снабдувачи”.

Џонсон додаде дека властите ќе ги поддржат компаниите што снабдуваат гас за домовите на британските граѓани “додека не заврши тешкиот период”.